Маҳалла ёрдами боқимандалар учунми?!

Фото: Mahalladosh
Фото: Mahalladosh

Бухоро шаҳар Мирзо Улуғбек номли маҳалла фуқаролар йиғи­нида истиқомат қилувчи Шаҳло Холиқованинг (исм-фами­лияси ўзгартирилди) таҳририятга фуқаролар йиғини томони­дан оилага ҳеч қандай амалий ёрдам кўрсатилмаётгани хусу­сидаги аризасини ўрганиш учун кетар эканмиз, йўл-йўлакай фуқаронинг аҳволига ачиниб, масалага нохолис ёндашган йиғин ходимларини ич-ичимиздан койиб бордик.

Мабодо учрашиб қолгу­дек бўлсак, турли баҳоналар билан фикримизни ўзгарти­ришга таъсир этмасин дея, Фуқароларнинг ўзини ўзи бошқариш органлари фаолия­тини мувофиқлаштириш бў­йича Бухоро шаҳар кенгаши ва ўша маҳалла ходимларини ҳам хабардор этмасдан, тўғ­ри мурожаатда кўрсатилган манзилдаги уйга бориб, кейин маҳалла масъулларини чақир­тирдик.

— Фуқаронинг турмуш ўр­тоғи шахсий автомашинасида киракашлик билан шуғулла­нади, уч нафар фарзанди бор, — дейди Мирзо Улуғбек ном­ли маҳалла фуқаролар йиғини раиси Соҳиб Шукуров. — Бу оила яқин кунларгача кам таъ­минланганлик нафақаси олиб турган эди. Аммо фарзанди икки ёшга тўлгач, оила даро­мадлари қайта ҳисобланиб, белгиланган мезондан ошиқ бўлгани учун, кам таъмин­ланган оилалар рўйхатидан чиқарилди. Шундай бўлса-да, фарзандининг боғча тўлови­ни имтиёзли нархда амалга ошириш учун маҳалла маъ­лумотномаси берилди. Уйини таъмирлаш учун эса тадбир­корлар кўмагида ҳашар уюш­тиргандик.

Раис шу важларни айтар экан, даъвогар томон ер чизиб қолди.

— Келинга илгари бир неча марта иш таклиф этганмиз, — дейди раис сўзини давом эттириб. — Аммо барчасини рад этди. Энди одам боқи­мандаликдан қочиб, ишлашни ҳам ўрганиши керак-да. — Ишлолмайман-да, рев­матизмим бор...

Аниқланишича, фуқарога саломатлигидан келиб чиқиб, уй меҳнатига оид ишлар ҳам таклиф этилган, бироқ....

Яна бир аризани ўрганиш учун Шофиркон тумани­га борамиз. Мурожаат эгаси ўзининг ночор аҳволи, ноги­ронлигини баён этиб, ўзи ис­тиқомат қилаётган маҳалла фуқаролар йиғини фаоллари умуман хабар олмаётгани, моддий ёрдам сўраб ёзган му­рожаатини бир неча бор рад этгани, моддий ёрдам тайин­лашда таниш-билишчилик қи­лаётганидан шикоят қилганди. Айтилган манзил бўйича бордик . Аммо...

Ҳашаматли дарвозанинг ўзиёқ хонадон туриш-турму­шини акс эттириб турарди.

Қия очиқ дарвозадан яп- янги «Nexia» автомашинаси, қарийб қирқ метр узунликда дид билан қурилган баланд иморат, замонавий эшик-ром­лар, тахминан 20 сотихча ке­ладиган томорқа экин майдо­ни кўриниб турибди.

— Аризани отам ёзган эдилар, — деди уйдан эри­нибгина чиққан 25-30 ёшлар­даги бир йигит. — У киши бир неча кундан буён вилоят­даги касалхонада даволаняп­тилар.

Очиғи, келишимиздан ол­дин ариза муаллифининг у билан телефон орқали сўзла­шувимизда бу ҳақда гапирма­гани ёки маҳаллада­гиларнинг маълумот­га эга эмас­лиги (одат­да қишлоқ жойда бу тахлит ­даги маъ­лумотлар бир зумда тарқалади) таажжуби­мизни уй­ғотди.

Фаоллар мурожаат муал­лифининг ўғли билан суҳ­батлашиб, айни пайтда улар­нинг моддий ёрдам ажратиш тўғрисидаги мурожаати оила даромадлари Вазирлар Маҳ­камасининг 2013 йил 15 фев­ралдаги «Кам таъминланган оилаларга ижтимоий нафақа­лар ва моддий ёрдам тайин­лаш ва тўлаш тартиби тўғри­сидаги низомни тасдиқлаш ҳақида»ги қарорига мувофиқ, тасдиқланган Низом асосида­ги мезонлардан юқори бўлга­ни боис ижобий ҳал этилмас­лигини тушунтиришди.

Оиланинг моддий аҳволи­ни янада яхшилаш мақсадида туман бандликка кўмакла­шиш маркази билан ҳамкор­ликда йигит ҳамда аёлини иш билан таъминлаш бўйича таклиф беришди.

— Сиздан иш эмас, мод­дий ёрдам сўралган, — деди йигит сўзимизни охиригача тингламай. — Сиз аризани яхшилаб ўқинг-да сўралган масала бўйича ўз ишингизни қилинг! Менга қарорни пеш қилаверманг. Нима, битта моддий ёрдамни ҳал қилол­майсизми? Маҳалла ҳам буни чўнтагидан бермайди-ку. Берсангиз давлатнинг пулини беряпсиз!

Фуқарога яна бир бор Ни­зом талаблари тушунтирили­ши ҳам, нафақалар нотўғри тайинланса, фуқаролар йиғи­ни раиси жавобгарликка тор­тилиши борасидаги огоҳлан­тириш ҳам бефойда бўлди. Кетар чоғимиз айтган сўзлари эса барчасидан ошиб тушди:

— Яхшиликни билмаган­лар! Майли шулар жабр кўр­масин, деб аввал олдинглар­дан ўтиб сизларга ёзгандик. Ана энди кўрасанлар. Отамга айтаман: ПОРТАЛга ёзади­лар!

Гарчи тўрт мучаси соғ йигитнинг бу таҳдиди эсан­киратмаган бўлса-да, унга ачинганимиз рост. Ижтимоий ҳимоя йўналишида маблағ ажратиш борасида мамла­катимиз етакчи ўринларда туриши сир эмас. Айниқса Президентимизнинг ташаб­буслари билан ташкил этил­ган Халқ қабулхоналари, виртуал қабулхоналар фуқа­роларнинг тўғридан-тўғри мурожаатларини давлатимиз раҳбариятига етказиш, қуйи бўғинларда тўрачилик, аҳоли билан ишлашда бепарволикка йўл қўйган айрим раҳбарлар­ни ғафлат уйқусидан уйғо­тишда муҳим туртки бўлди.

Аммо ана шундай эътибор, ғамхўрликдан ғайриқонуний манфаатлар йўлида фойдала­ниш мақсадида, айнан Вир­туал қабулхонани пеш қилган ҳолда ҳақиқатда ҳам муҳтож, кам таъминланган фуқаролар ризқига кўз тикаётган баъзи кимсаларнинг хатти-ҳаракат­лари кишини чуқур ташвиш­га солади.

Ха лқимизда: «Қўлдан берганга қуш тўймас», де­ган ибратли мақол бор. Шу боис айни пайтда кам таъ­минланган фуқароларга аж­ратилган ёрдамларнинг ак­сарияти шунчаки еб-кетарга эмас, балки уларни маълум тадбиркорликка йўналти­риш мақсадида берилмоқда. Аммо айрим ҳолларда баъзи фуқароларимизнинг ногирон­лигини ёки кам таъминлан­ганлигини пеш қилган ҳолда тадбиркорликка йўналтирил­ган имтиёзларни рад этиб мунтазам равишда моддий ёрдамлар таъма қилаётган кимсалар ҳам афсуски, йўқ эмас.

Биз ривожланишни ўз олдимизга мақсад қилган эканмиз, аввало, бу борада ўзгаришни ўзимиздан бош­лашимиз, боқимандалик кай­фиятидан халос бўлишимиз керак. Зеро, мамлакатимизда халқ учун амалга оширилаёт­ган ҳар бир ўзгариш ислоҳот­лар мамлакат тараққиёти ва аҳоли манфаати учундир.

Акбар РУСТАМОВ

«Mahalla»

Изоҳ 0

Изоҳ қолдириш